【Viu】謝霆鋒尾場啟德騷《Evolution Nic Live進化演唱會》，繼續有最強「家庭應援團」愛的撐場，兩「餅印仔」Lucas、Quintus同嫲嫲「拉姑」狄波拉一齊坐，應傳媒要求齊齊向鏡頭舉V字手勢，超溫馨！哥哥Lucas笑容滿面，相反細佬Quintus表現得相當怕醜，拉姑仲不停咁話：「多謝大家！」
當Lucas被問到覺得爸爸個Show點樣嗰陣，拉姑雙手合十講多謝代答，再問到Lucas可唔可以講兩句嚟支持爸爸？拉姑再做孫仔嘅代言人：「支持呀！嚟咗就支持㗎啦！」
話快咁霆鋒就唱到尾嗰part，繼續同fans大合唱是常識吧！講緊就係《非走不可》啦！唱過幾首抒情歌後，霆鋒接唱快歌《開放日》一秒再焫着返個場，全場high翻天！最後如頭3場一樣，last song就係《活著VIVA》，霆鋒彈完最後一粒音掉結他pick再轉身離場型到冇朋友！唔知霆鋒幾時可以再開騷呢？惟有loop爆條實況片頂頂癮！
另外，嚟睇尾場嘅歌手朋友有陳慧嫻、蔡一智夫婦、徐濠縈、古巨基、周汶錡、林奕匡等！
