【Viu】謝霆鋒嘅頭場啟德騷《Evolution Nic Live進化演唱會》越後越精彩！中段佢乘巨型波波出場都未算最震撼，唱《潛龍勿用》嗰陣大舞台分裂出一個拱形舞台，霆鋒喺拱形舞台上方現身，隨住舞台慢慢延伸出觀眾席，期間不乏煙火、投射effect，場面勁震撼！不過霆鋒搞笑話喺綵排呢part嗰陣，內心係講咗十句粗口，希望大家睇到呢個勁爆場面都同佢有同感！
之後霆鋒降返到台面唱新歌《逆行》，繼而將寵粉行動升級，踏上「輸送帶」由場中快速「飛」到場尾，近距離親親場尾位置嘅fans，後來又帶嚟《今天你生日》、《黃種人》，霆鋒唱勻啟德主場館每一個位置超正！
