【Viu】姜濤今日現身《麥當勞兒童愛心馬拉松》，即席獻唱生日歌賀店家50歲生日外，仲同麥當勞叔叔、滑嘟嘟、小飛飛同漢堡神偷，以及一班小朋友齊齊拉筋熱身。向來恨生女嘅姜濤哥哥，一見兩位小妹妹上台就主動Say Hi兼派心，唔知係咪因為太早起身，小妹妹冇咩反應，當準備落台時，姜濤哥哥再伸出友誼之手講Bye Bye，可惜依然「食檸檬」，搞到要慘慘豬咁同麥當勞叔叔訴苦呀！
而姜濤同麥當勞叔叔似乎已經變咗老Best，除咗喺台上玩到癲，移師去起跑位時仲主動想幫叔叔擔大旗，so sweet！鳴槍時，整蠱姜濤嘅重任就由小儀轉交到林海峰手上，而「軟硬天師」喺台上嘅30秒Speech仲成功令全場捧腹大笑！想知就睇現場實況啦！
