【Viu】Stephy鄧麗欣一連三場「STEP by STEPHY鄧麗欣紅館演唱會2025」，噚晚嚟到第二場，除咗有老闆林建岳、Anson Kong@MORROR、陳嘉寶、何嘉莉、森美、Oscar同埋小肥等等圈中朋友捧場外。一班前Cookies成員亦聚首一堂，包括Kary吳雨霏、Miki楊愛謹、Angela區文詩、Elaine何綺玲同埋Gloria陳素瑩，齊齊為Stephy應援！
Stephy特別請嚟合演電影《我談的那場戀愛》嘅拍檔MC張天賦做表演嘉賓，仲襯到絕以白色服裝上陣合唱《好心好報》。MC向Stephy表示好緊張，「因為好少同你咁近距離，上次係拍戲打呔嗰陣，所以而家都有啲餘韻，好緊張！」佢坦言綵排時見到Stephy對高踭鞋好高，令佢唔敢靠近。MC又搞笑話：「我好早認識你！」Stephy無奈一笑。MC續指：「我每次演出最緊張係記歌詞，有時要靠提詞機，但今次合唱呢首歌我唔擔心，因為啲歌詞我好熟，我好自信可以望住你唱。」Stephy冇咁好氣話：「唉，你講啦，細細個去唱K成日唱吖嘛，我俾你講，無所謂！」MC稱今次同Stephy合唱係成就解鎖，完成兒時夢想，引發全場大笑！Stephy送呔答謝MC做嘉賓，更完美還原電影中Stephy幫MC打呔調情戲，兩人非常靠近，幾乎面貼面，MC即緊張到口窒窒，正當Stephy讚佢冇面紅時，佢一秒耳紅。Stephy退場後，MC不停用手撥風為耳朵降溫，「真係唔呃人，我一尷尬就耳仔紅。」然後獻唱新歌《說謊者》。
演唱會尾聲，Stephy演唱《Fantasy Tale》，全場興奮企起身跳舞，氣氛熱鬧！佢透露大銀幕展示嘅畫，係佢特別為今次演唱會而畫，雖然準備演唱會好忙，但仍堅持畫畫，希望視覺上都加入自己嘅心思。完場後歌迷唔肯散場，熱情大嗌encore，Stephy再出場唱Cookies嘅《最後一塊》！
