【Viu】Ian陳卓賢、Natalie許恩怡同導演梁禮彥今日為電影《久別重逢》努力跑謝票場，下午喺沙田嘅一場謝票，Natalie講到深刻場景，佢話有一場喺禮堂拍攝Ian飾演嘅蘇昇華要彈奏唔同旋律，Ian竟然可以即時按照唔同嘅答案去彈相應感覺嘅旋律，覺得Ian彈得好準好勁，而Ian就解釋嗰吓好即興，如果而家要彈返嗰個旋律，恐怕都好難exactly彈返出嚟！而Ian自己覺得好多幕都好深刻，有一幕佢喺沙灘見到伊健，因為喺劇入面冇諗過會見到將來嘅自己，覺得同呢個人有種熟悉感，現實生活中如果遇到將來嘅自己，佢會講啲咩？Ian話會握個手，同佢講「辛苦晒」，同埋寒暄幾句喎！
後來有觀眾問Natalie同伊健合作咩感受？佢話完全冇大前輩嘅感覺，因為伊健冇偶包，成日同人傾偈，令到劇組氣氛輕鬆，覺得伊健係希望氣氛輕鬆令到自己都冇咁緊張！
至於最難演繹係邊部份？Natalie話耍骨灰嗰場好有挑戰，劇本原本寫會見太陽，但天氣預告話拍攝嗰日唔會有太陽，導演就寫另一個版本，拍戲唔知會發生咩事，到埋位先知，好彩團隊都好好配合得好快！而Ian就話好難特定講係邊一場，反而係呢個角色偏向內斂，又要畀人察覺一啲變化，要演繹點樣表露出嚟都唔容易，佢有諗過為個角色加啲嘢去突顯某方面特質，但覺得平淡當中先有啲唔同情緒感受，而並非喊得好勁就代表好傷心，有時平淡傷心先更加貼近角色，想知更多睇現場實況啦！
