【Viu】啱啱踏入12月，Ian@MIRROR就化身聖誕老人送禮物畀Hellosss！今日佢開記招宣布舉行首個海外巡迴《IAN CHAN “TEARS” IN MY SIGHT SOLO CONCERT TOUR 2025》，將呢滴「眼淚」暫定帶去4個地方：倫敦、墨爾本、悉尼、澳門，預計下年年頭啟航，呢單嘢足以令Ian又變身做「戚戚賢」，係得戚個戚呀！
Ian透露巡唱會繼續兼顧音樂總監，咁監製細榮又會唔會跟隨？據知細榮喺呢幾年都謝絕走tour，陳總會出咩絕招？莫非係美男計？陳總又講到當初知道搞巡唱係好受寵若驚，好感恩有呢個機會，好多謝Hellosss嘅支持！
之後會唔會再有多啲場次？陳總指都好希望去更多地方，例如佢知有好多Hellosss敲碗加拿大站，但都要視乎當地嘅場地同檔期，又會盡量安排喺周末開騷，方便Hellosss嚟睇騷，真係好貼心呀！
講到巡唱Rundown同舞台，陳總話會有變更，相信一定會畀到Helloss新鮮感，包唔包括歌衫？會唔會繼續有嗰件deep U背心？Ian鬼馬笑答：「咁就睇吓有冇洗wer咗啦！」真係好幽默㗎啫！另外，巡唱會唔會有認識朋友嘅嘉賓section？尾場會返香港再開騷做ending好頭好尾？下一份禮物又會唔會係大碟？睇足本訪問開估！
