【viu】由金馬影帝吳慷仁、柯煒林（Will）、劉主平同梁湘華主演嘅台灣電影《破浪男女》，以連場情慾戲探討現代男女嘅愛情同性愛觀，早前喺台灣上映嘅時候，已經成為全城熱話，依家仲打住「衝擊電檢尺度」嘅旗號登陸香港，慷仁哥、劉主平同梁湘華齊齊同各位Viu1觀眾「談情說性」！
三位直言一開始收到劇本嗰陣，不禁「嘩嘩聲」，但由於對導演楊雅喆嘅信任，獻出從影以嚟最赤裸嘅一次，仲異口同聲激讚團隊尊重演員，安排親密指導同大家仔細講解，慷仁哥亦坦承以前試過臨場被加親熱戲而要「硬食」，但今次絕對係露得自然同舒服，希望大家細味每個角色嘅傷痛，相信所有愛過痛過嘅人都有共鳴！
講到主平同湘華喺片中飾演無所不談嘅閨蜜，主平原來心思思想同湘華交換角色，原因係想試吓被綁嘅感覺，聽到慷仁哥只笑不語，兩位新時代女性真係好敢講、好敢傾呀！三位又呼籲大家一定要入場支持，事關自己第一次睇完套戲之後，同Will一樣感動到喊，加埋首片尾歌《楞嚴咒》，成個人好似被超渡重生一樣！
