【Viu】ViuTV全新選美真人騷《美麗40路》今日喺觀塘舉行記者會，4位主持Hailey陳俞希、Scarlett黃心美、孫慧雪、Vivian劉明軒孖大部份參賽者靚靚出席。Hailey爆回巢嘅心美獲監製、導演「特別照顧」唔使出外景，心美就反指Hailey着勁高踭嘅鞋「再度發育」，仲互爆對方嘅擇偶條件添！
Vivian驚訝有佳麗喺節目大膽透露床上技巧，仲話要跟住學嘢！阿雪就自愧身材唔及一眾佳麗們，選擇包到冚出席，又指Vivian幫佢全家睇命盤，係心靈治療師。講到之前患子宮腺肌症爭啲要切除子宮，阿雪話目前食藥可控制，所以亦宣布封肚唔再生第三胎。
參賽者Taylor馬麗如、Bonnie文炎君、高以嘉同Barbie陳懿汶就話平常心參賽，佢哋感激家人支持。身為星級排舞師嘅Bonnie話最近好友芯駖@COLLAR都有鼓勵佢。2013年已嫁去台灣開火鍋店嘅Taylor就係一眾主持嘅心水，佢講笑話今次返香港開心留低唔少腳毛。17歲患過Cancer嘅Barbie就以正能量控制病情同心情。而做咗多年全職媽媽嘅以嘉就希望出嚟見世面，大家又有咩心水佳麗？睇吓足本訪問，都要記得睇節目喇！
