【Viu】Stanley邱士縉明天（20日）34歲生日，昨日出席由fans club籌辦嘅《Stanleyholic》生日會，與200名幸運Team Stanley（TS）提早慶生。大表哥一嚟已好感觸，諗返對上一次跟TS聚會已經係5年前剛出道時，喺觀塘搞嘅fans meeting，當時規模冇咁大，仲話多謝admin一直以嚟嘅陪伴同努力，真係好滾動呀！
大表哥表示生日目標係要做好每一件事，活動上更率先披露將歌影視三棲發展，咁叻叻，被問到假如有日得到演員獎會點同波波們慶祝？Stanley認真回答：「咁又搞返個好似而家咁嘅慶功宴啦！我擺個獎喺度，大家可以一齊拎嚟影相，到時擺中式，要有龍、鳳背景嘅茶樓做布景。」
寵粉嘅大表哥當然唔少得派福利，切過蛋糕後，就係互動遊戲時間，過程中「大表波」自爆沖涼時先洗身，並即時真人示範，令到TS陷入失控尖叫狀態。隨後去到Q&A環節，有人問結婚問題，有人送禮後喜極而泣，仲有一位婆婆話想收Stanley做契仔，場面真係有笑有淚。
互動過後，Stanley亦向波波們回禮，獻唱新歌《Drunk in Love》，期間更走到台下與fans握手，掀起整個活動高潮。至尾聲，Stanley仲有好一段好深情嘅對話跟波波們告白，想睇更多就要即刻睇片。
