【Viu】姜濤一向愛心爆棚，日前去到跑馬地馬場出席香港麥當勞舉辦嘅第15屆「麥當勞兒童愛心馬拉松」，今年佢第二年擔任「香港麥當勞叔叔之家慈善大使」，希望宣揚「小朋友幫助小朋友」嘅精神。喺過去一年，「香港麥當勞叔叔之家」一共籌到超過1400萬的善款，而「麥當勞兒童愛心馬拉松」15年以嚟累積超過70,000位參加者，今屆亦都吸引咗近6,000名大小健兒報名，氣氛超熱鬧啊！姜Admin呢日喺酷熱天氣下同6,000名大小健兒進行馬拉松起步禮，雖然熱到大汗疊細汗，依然化身「活潑姜」同跑步選手Selfie，為大家打氣加油！
另外，姜Admin早前仲身體力行，去咗上年11月正式啟用觀塘家舍做探訪，玩遊戲之餘又同病童媽媽們傾偈，氹到一班小朋友勁開心！佢話希望盡少少綿力，呼籲更多人支持呢個慈善項目，幫助患病嘅小朋友同佢哋嘅屋企人。
