【Viu】姜濤今日推出13胎《岩巉》，新歌由林家謙作曲，Wyman填詞，姜admin想藉住作品分享自己誠心等待真命天女來臨嘅感情態度，自己亦唔排除如果遇到合適對象，都會好似MV入面平行時空嘅姜濤，勇敢去愛。姜admin分享歌曲誕生嘅經過，「我有問過Wyman老師，佢覺得我對愛情係一個好有耐性嘅人，唔會急於輕易搵另一半，用『岩巉』唔係因為我哋好奄尖，而係我哋真係好誠心去等待完全適合我哋嘅另一半。」而姜濤亦分享自己嘅愛情態度，「我而家冇話想拍拖住，唔夠膽諗太多嘢，因為自己本身已經有太多事情要處理，所以如果再加多一份愛情喺度，未必處理得到。如果遇到一個啱嘅人，我又唔會完全放棄愛情呢件事，但暫時係事業為先。」
而新歌MV其實是《愛情簽證申請》的延續，姜admin再次做返自己，飾演備受注目嘅當紅偶像，佢都參與MV故事創作，「MV係同導演一齊構思，做返喺平行時空裡面嘅姜濤，如果佢真係拍拖會點做呢？當我遇到一個真係好啱嘅人，我會奮不顧身去保護佢，同埋會向大家宣布我好鍾意呢個人。咁啱《愛情簽證申請》MV最尾寫住To Be Continued，仲有個續集未拍，好想自己作品有個完整性，不如今次完成埋佢，當係另一種平衡時空嘅延續。」姜admin透露兩個MV入面有好多小細節係可以對得上，希望大家可以發掘到呢啲彩蛋！
話明係《愛情簽證申請》延續，姜admin再次請到Tammy林思廷擔任女主角，雖然佢哋曾經傳緋聞，但話晒都因為劇集《超感應學園》而成為好友。姜admin不避嫌再搵對方幫手拍MV，仲同Tammy有大量甜蜜互動，包括床上戲、搭膊頭、仲有閃爆咀嘴戲。講到再次請Tammy做女主角，姜濤表示：「實在好多謝佢嘅幫忙。我每次去台灣都會同《超感應學園》呢班Friend見面，一直都有保持聯絡，所以同Tammy冇話生疏咗，所以拍攝過程都好順利，又好開心。」
