【Viu】《鋼之鍊金術師展・香港站》喺4月29日至6月11日登陸尖沙咀新港中心1樓Anima Tokyo，身為「鋼鍊迷」嘅ERROR成員吳保錡日前率先到場打卡，走勻7個獨特展區，睇到超過300幅荒川弘老師嘅漫畫手稿同彩色插圖，以及美侖美奐嘅服裝同道具時更加係嘩嘩聲，開心到飛起呀！
期間保錡同最愛嘅艾爾1:1模型Selfie，又喺投影鍊成陣動畫度Chok爆結手印，同埋學愛德華鍊成手臂，仲興奮咁係「真理之門」度彈出彈入，好彩冇Die咋，真係畀呢個「中二錡」笑死呀！除咗打卡熱點多籮籮外，是次香港區展覽仲獨創9款特色美食，包括可以重現馬斯丹上校彈指放火嘅「焰之鍊成」串燒、熱狗同炸雞等，最正係可以自己煉成「賢者之水」，玩味十足！
保錡大讚《鋼之鍊金術師展・香港站》好玩又好食，玩到唔捨得走，仲自認係「艾爾狂迷」，珍藏咗唔少精品同Figure，又趁機反映自己飽受「土地問題」困擾，希望有樓盤同傢俬贊助，等佢可以住大屋同有大飾櫃擺放動漫精品，大佬果然轉數快呀！想知保錡喺跑步路上點樣受到鋼鍊嘅「等價交換」概念影響？佢又覺得ERROR兄弟似鋼鍊嘅乜嘢角色？睇足本訪問就保證得到好多真理喇！
