【Viu】電影《周處除三害》今晚舉行首映禮，戲中幾位主角「小天」阮經天、王淨、Ben袁富華現身造勢，小天更係相隔9年再嚟香港見fans！
新戲目前喺台灣勁收3500萬台幣（約875萬港元）票房，小天話要再落力宣傳，希望香港有好成績，提到派福利即刻笑話交畀王淨再現半裸鏡頭，搞到王淨露出天然呆表情，之後小天再轉軚話同Ben哥合體做一件事嚟回饋fans！戲入面小天同Ben哥打到飛起，小天被爆演到崩潰，而首次拍打戲嘅Ben哥就謙虛話冇資格嗌辛苦，靠意志力堅持落去！
至於講到王淨同Ben哥嘅連場情慾戲，Ben哥秒跳入《叔·叔》身份抵死笑話平時同開男人拍親熱戲，今次嘅對手換咗係女性勁怕醜，又話事前最緊要同王淨溝通清楚！王淨大方指唔會太過緊張，代入角色演出唔諗太多！另外，想知小天憑電影入圍金馬獎「最佳男主角」心情？新戲疑捲入抄襲劇本風波回應？睇足本訪問去片！
