【Viu】Jay Fung馮允謙處男紅館騷，噚晚迎接第二場，蔡一傑、ANSONBEAN、JER@MIRROR、Tim@Dear Jane同老婆楊洛婷、肥仔@ERROR、徐㴓喬以及洪卓立同Hillary都拍住拖入場支持！噚晚表演嘉賓林明禎特意換上全新紅色貼身裙，大騷身材同美腿，令Jay同佢呢part貼身舞，火辣程度大大升級！而呢晚另一位嘉賓就係好兄弟釗峰啦，一上台佢哋即刻互相表白，話對方喺自己心目中好重要，釗峰仲自爆曾經喺Jay生日，模仿過Jay 錄咗一段旋律唱咗句生日快樂俾佢，正常應該回覆一句多謝，最多俾埋心心，點知Jay居然錄返條影片俾佢講多謝，釗峰仲喺台上公開咗呢條片，播完之後，釗峰即刻問大家係咪好Sweet？仲講笑話當時即刻想check下自己糖尿指數添！提到Jay曾經喺節目講過：「我每次見到釗峰都好開心、好想笑，佢個樣好似Snoopy。」所以釗峰呢晚特登準備咗Snoopy擺設送俾Jay，收到禮物嘅Jay即刻攬住兄弟話雖然份禮物好可愛，但真嘅Snoopy已經喺我身邊！全場觀眾即刻尖叫，真係Sweet到糖尿病啦！
噚晚演出Jay Fung兩度淚曬舞台，仲喊住感謝父母支持佢追音樂夢，場面超感人！而喺演唱會尾聲，Jay亦邀請台下觀眾一齊開手機燈影大合照，非常壯觀啊！
