【Viu】男團P1X3L今日現身時裝店擔任一日店長，提起師妹COLLAR成員Day、Candy噚晚飛首爾拍節目，三子勁葡萄話超恨拍團綜，但轉個頭就漏口風話籌備團綜中，暫時方向未定，就睇吓三子可唔可以成功衝出香港啦！
繼而Phoebus篤爆Marco拍緊個綜藝節目，Marco搞笑話向公司做咗手腳，係個「自癡肥」計劃，將會惹起全男人嘅妒忌，一皇對十幾后，仲要個個都係女神級添呀！不過自認「母胎單身」嘅佢，話一早set定零親密接觸嘅底線，即使係過夜極限都只係排排坐，到最後有冇反高潮就真係要睇節目出街啦！
《全民造星V》如火如荼進行緊，Marco搶答有留意Phoebus嘅同學劉馬車參賽，仲抵死「投訴」Phoebus唔一早介紹，令佢覺得相逢恨晚，事關佢私下J晒劉馬車啲片！講到potential，佢哋指劉馬車已經係十項全能嘅「再造星」；另外，George話會全力支持排舞老師KC參賽，大讚對方靚仔又跳得！最後佢哋終極劇透今屆參賽者唱歌有實力，又識玩樂器，仲有位師弟同姜濤撞樣，嘩！咁咪顏值爆燈？
