【Viu】噚日多位歌手同組合齊齊出席《新城勁爆頒獎禮2022》記者會，場面非常熱鬧！鄭欣宜(Joyce)對於再冧莊再拎女歌手獎，佢就話信心十足，搞笑咁話未出道嗰陣都已經好有信心攞獎添！至於12月準備開騷嘅許廷鏗(Alfred)就透露演唱會有跳舞環節，不過就講明未必會除衫！
有份爭組合獎嘅P1X3L都係以平常心面對，但講到Phoebus 有份角逐新人獎，Marco同George就話好想兄弟得獎嘞！果然係好巴打！而馮允謙(Jay Fung)就表示對自己今年作品好滿意，特別睇好《給缺席的人唱首歌》。作為女新人嘅雲浩影(Cloud)就好謙虛咁話所有對手都係勁敵，仲話今年成個樂壇都非常健康，大家都創作唔同類型嘅音樂，Cloud仲好鬼馬咁話如果之後自己寫歌，咁到時前輩Jay Fung就係佢嘅勁敵啊！
至於一向鍾意同靚仔合作嘅麗英，呢日孖住兩位男新人CY陳宗澤同Zeno顧定軒接受訪問，麗英自己已經諗好幾時同兩位合作，CY仲話私下已經諗好佢哋3人嘅組合名添！
