【Viu】香港電台今日舉行團拜活動，席間宣布《十大中文金曲》頒獎禮將於5月復辦，詳細情形港台高層今日不作回應，留待下星期開嘅記者會再公布。以電台創作總監現身嘅馬浚偉，受訪表示以佢所知上年港台同TVB合辦嘅《香港金曲頒獎典禮》因疫情關係就僅只一屆，雙方嘅目標都係想各自分開搞番，不過佢都好希望之後會再有跨媒體嘅頒獎禮。
繼而馬仔點名話好欣賞MC張天賦、MIRROR、Phil、Janice等歌手，嚟緊籌備嘅音樂劇都想同樂壇新血合作，但自嘲「一把年紀」就唔學MIRROR跳唱啦！
提起老友劉心悠秘婚，馬仔醋爆話完全零知情：「好明顯唔係好朋友啦！連個老公係邊個都唔知，淨係話我知去讀藍帶⋯ 囍帖、餅卡都冇⋯」所以佢笑話等對方蜜月期後返嚟「興師問罪」，笑問佢幾時結婚？馬仔搞笑話：「你唔好理我啦！」
