【Viu】 喺今年疫情高峰期加入樂壇嘅Edward黎啟峰，繼一月推出首支單曲《三生有幸給挑選》，啱啱九月都發行咗佢第二首派台歌《棄養》，延續上一次嘅寵物主題，以真狗真事反映棄養寵物嘅社會問題，繼續為毛孩發聲！連佢身邊嘅朋友都封佢為寵物大使，不過Edward話之後有機會都會唱返啲情歌！問到Edward最欣賞邊一位樂壇新人，佢就話好想同Jaime張天穎合作，仲話覺得佢嘅vibe好正添啊！而講到同樣係參加《全民造星》嘅MIRROR，佢就話超欣賞鏡仔個個都十項全能，尤其係Edan嘅EQ超級高 ，令佢非常羨慕啊！
