【Viu】電影《正義迴廊》取材自2013年嘅大角咀肢解父母案，Jan林海峰同蘇玉華喺戲入面同樣飾演資深大律師，分別代表兩個疑犯上庭辯護，今次有機會同阿Jan大鬥辯才，阿蘇當然勁興奮喇！法庭審訊案件部分本身就充滿咗戲劇性，其中一場喺大排檔拍攝嘅場口，就帶有強烈舞台劇嘅感覺兩位都覺得零舍過癮。電影由多位資深舞台劇演員擔任主角包括楊偉倫等等，當中蝦頭楊詩敏嘅演技連阿Jan都話印象深刻，而第二次拍戲嘅麥沛東，早前就贏得香港國際電影節「新秀電影競賽（華語）」最佳男演員獎，阿Jan同阿蘇都好戥麥東開心，仲希望佢喺其他影展再下一城。拍攝期間嘅氣氛雖然好嚴肅，但成個團隊互相support鼓勵，令阿蘇覺得相當有動力，佢特別多阿Jan嘅救命之恩添。
