【Viu】新劇《野人老師》喺10月3號已經正式開播，導演陳賢俊對於飾演劇集靈魂人物李白、李世豪嘅Stanley同旦哥鄭丹瑞有讚無彈，佢唔單止話旦丹係李世豪嘅最佳人選，同旦哥前期開會嗰陣得到唔少啟發添，講到Stanley嘅演出，陳導演就俾成90分，話唔俾滿分係因為留返個進步空間喎！陳導演大讚Stanley面對旦哥一啲都唔怯場，仲不斷睇片檢討自己嘅演出，將角色處理得好細膩同立體，係「真正嘅男主角」啊！陳導演亦好佩服Frankie為咗角色不斷上堂學柔道，完全感受到Frankie幾想做好件事。男演員實力相當，但女演員一樣唔輸蝕，談善言啲戲好到陳導演都忍唔住要表白話：「我真係好愛呢個女演員！」佢亦大讚喺劇中演人妻同人母嘅Shirley表現相當好。
另外陳導演仲自爆嚟緊會有新劇開，雖然暫時未知演員陣容，但佢就話好鍾意Stanley，有機會都想同Stanley再合作，仲話編審Emily睇完Stanley所演嘅李白，都想搵佢拍戲啊！大表哥聽到實開心死啦！
