【Viu】Joyce欣宜、Jason陳柏宇、Phil林奕匡、陳明憙、旦哥鄭丹瑞等今日出席《羅文．傳承 全城紀念演唱會》記者會，喺台上Joyce笑言：「如果人生嘅緣份唔同，uncle Roman可能做咗我爸爸，係人都知佢同我娘親係好好朋友。」事後Joyce解釋呢段「爸爸論」，佢話：「即係緣份囉！好似今朝我食煎蛋同炒蛋，可能今日發生嘅事會唔同咗！」咁細個時有冇一刻真係誤以為羅文係爸爸？Joyce陰陰嘴笑：「咁係人都知佢同我娘親好friend，佢哋又組情侶合唱團喎！」
Joyce又表示，鍾意表演或多或少都受羅文影響，「佢離開時我先12、3歲，記得以前成班auntie喺餐廳食飯，食食吓uncle Roman就成日同Joy Joy唔見咗，我喺一角跳舞，uncle Roman就拍晒手一路哈哈笑，係佢一直鼓勵我。」
