【Viu】Jason陳柏宇同Sophy王嘉儀呢個全新組合早前喺StarHall舉行音樂會，喺騷度除咗獻唱自己嘅新歌之外，佢哋仲大搞新意思，用咗超過一半嘅時間嚟翻唱其他歌手嘅歌，有啲仲特登重新編曲，勁有新鮮感！而喺台上Jason亦大讚Sophy嘅歌係好嘢嚟，叫觀眾聽多啲Sophy嘅作品，搞到Sophy鬼咁感動，仲即刻話：「多謝大佬！」，而Jason就神回一句：「我冇做大佬好多年」，真係笑死啊！事後，Sophy都話今次同Jason開騷真係袋咗好多嘢落袋，不論請教舞台經驗嘅事定用聲方法，Jason都好有耐心咁解答啊！嘩，Jason咁唔話得，好難唔認你做大佬喎！
