【Viu】Candy盧巧音噚晚喺麥花臣開騷，由第一隻碟開始唱，唱盡《自戀影院》、《垃圾》、《落地開花》等金曲，其中《其實我想寫隻歌》更加係送畀移民嘅朋友，令大家好有共鳴。
其實呢個騷原定1月初舉行，奈何受疫情影響延期，難怪Candy慨嘆等到頭髮都白埋呀！Candy直言一場唔夠喉，但場館檔期只容許補一場，希望快啲再開騷，亦承諾會繼續做新歌。老公Sammy@Kolor一入後台就錫錫老婆，仲點歌話老婆下次要唱返《逆插玫瑰》，Candy即搞笑話：「人講你又講！」
此外，講起Candy早排話嗲哋因病入院，佢話爸爸依然抱恙，加上疫情冇得探病，份外心掛掛，好彩有老公同朋友支持，又承諾完騷後會煲湯慰勞老公，希望Uncle早日康復啦！
