【Viu】阮小儀及陳健安（on仔）今日喺九龍灣出席ViuTV節目《21克公寓》，第一次做主持嘅on仔，話一知道個節目係講生死教育，就即時答應咗。節目其中一集搵咗廖啟智遺孀陳敏兒做嘉賓，小儀話好感謝對方答應受訪：「敏兒姐話智叔離開咗之後，佢都冇接受過訪問，但係睇到今次個節目覺得好有意義，想鼓勵大家係難過嘅時候要咬緊牙關去面對，所以佢願意接受訪問。」問到小儀同on仔平時點面對自己嘅負能量？小儀就話自己會選擇好坦白咁同朋友傾，而on仔就話：「我有好多方法，好似做運動、搵朋友呻，又或者會寫低佢，之後睇返就會覺得其實唔係咁大件事。」
講到一票難求嘅MIRROR演唱會飛，小儀話自己仲未有飛：「我仲未收到飛，不過我對Edan有信心嘅，唔係畀壓力佢，但係我對佢有信心嘅。」
