【Viu】被封「ViuTV一姐」嘅Hailey陳俞希俾《晚吹 - 空肚講宵夜》兩位拍檔梁祖堯同BabyJohn叫佢八婆，不過Hailey就爆媽媽其實一開始有啲唔鍾意啊！Hailey而家主持咁多唔同節目，仲做埋一姐，喺心態上都有少少轉變，不過唔係變囂噃！而係覺得自己多咗份使命感，希望帶到啲訊息俾觀眾，認真抵讚！而嚟緊Hailey都有新節目出街，係講媽媽煮暗黑料理，啲餸仲難食到佢嘔返出嚟添啊陰公！
講到感情方面，Hailey就講笑話疫情下啲男仔都唔知走晒去邊，好難識到新對象，仲話因為自己缺乏安全感，所以唔會考慮搵圈內人做男朋友！Hailey更大談前男友偷食，俾佢捉姦捉上床一事，呢個經歷確實令佢有好大陰影，但好彩嘅係而家已經放低咗！努力搵另一半同時，今年已經34歲嘅Hailey都考慮生小朋友，同心郁想雪卵，仲話為咗繼續拼搏事業，想搵代母生B添！
