【Viu】人氣王姜濤今日23歲正日生日，FC今日安排傳媒齊齊搭「姜濤號」去「姜濤灣」，當電車駛到sogo附近，兩旁企滿姜糖，大家齊聲祝福姜濤生日快樂，場面相當震撼！銅鑼灣多個打卡位有警員駐守，又有廣播提醒巿民唔好違反4人限聚令，姜糖們亦醒目地打卡及派應援，安全至上！
FC Admin透露香港連外國應援共花費7位數字，同時都有舉行生日義賣同籌款，幫助姜Admin最關心嘅小朋友，將應援同行善平均分配。而姜濤亦有拍片多謝Fans，亦祝願疫情快啲過去，大家可以去旅行！姜糖Winnus及Suki分別帶同囡囡Janus同Ashley到「姜濤灣」慶祝，佢哋仲book埋酒店諗住玩通宵，不但得到「前夫」支持，兩位小朋友都話對捱眼瞓未驚過呀，Ashley仲清唱咗兩句《蒙著嘴說愛你》，好Cute Cute呀！ 另外，Fiona同Annie C都有分享入坑經過，仲祝福姜Admin可以做更多好音樂，同埋快啲出pool拍拖，最後6位姜糖仲自創祝福語，祝偶像「身體快樂」！啱呀！人冇事先做到「亞洲第一」㗎嘛！
