【Viu】Jay Fung（馮允謙）今日帶埋師妹Cloud（雲浩影）出席口罩活動，問到Cloud有冇乘機向師兄邀歌？佢笑話唔夠膽出聲，因為知道對方爭落一身「歌債」，但就率先預告5月頭會有出道作，大家可以拭目以待！
至於Jay Fung話其實一直以嚟都有個宏大嘅目標，就係要幫樂壇每一位歌手寫歌，但搞笑話目前進度只係得0.5%：「我唔瞓覺都寫歌，日頭出去工作，夜晚就寫歌，我係唔會停㗎！」之但係7月就開騷，早前仲話要減肥騷肌，會唔會趕唔上進度㗎？原來Jay Fung已經諗住縮沙：「我依家冇信心（騷肌），咁我啲fans都唔係嚟睇我騷肌，係聽我唱歌嘛！準備閉關練聲！」
