【Viu】吳建豪（Van Ness）日前宣布進軍國際簽約Virgin Music，仲會好事成雙推出全球發行英文專輯，其中創作新歌《CHILL》喺聽日面世！身在美國西岸嘅Van Ness，今日舉行線上記者會，席間首播新歌《CHILL》MV，仲率先畀傳媒試聽《It’s on》、《Take a Ride》。對於出碟Van Ness話好不可思議，既感恩又緊張，因為受疫情、之前腳傷影響之下，所以嘢都延遲晒。
期間Van Ness透露新碟係同團隊橫跨多地製作，由倫敦飛到日本、泰國再去到洛杉磯，仲大爆《CHILL》入面嘅一個小秘密，原來舊年拍MV嗰陣係以中文版拍攝，聽到要改製成英文版嗰刻，Van Ness都不禁話：「有啲抓狂！」但結果出奇地覺得唔錯，正體現《CHILL》所帶出嘅精神：「有甚麼來甚麼，世界上每刻都有事情發生，但is ok，不要那麼緊繃，放鬆一點。」
隨後Van Ness接受訪問，一開始就用廣東話打招呼：「好耐冇見啦！大家好！）提到佢加盟新公司做Lady Gaga、Justin Bieber、Taylor Swift等國際歌手嘅師弟，之後會唔會有機會同佢哋合作？Van Ness話希望有呢個機會，但一切都要等公司安排：「）能夠加入還挺開心、榮幸，畢竟我剛回到台灣，第一間面試的唱片公司就是Virgin Music，但當時可能是不對的時間，這次回到原本的地方、在美國發片，是蠻特別的。」又透露之後會喺美國嘗試唔同嘅嘢、同唔同製作人合作，例如演戲。
問到Van Ness有冇計劃嚟香港或者係搞個亞洲巡迴演唱會？佢話之前已經好想嚟香港探對契仔女（安志杰對小朋友），但因為疫情關係嚟唔到，而咁啱安志杰一家四口近日飛咗返美國，所以Van Ness話啱啱先去完佢哋屋企，笑指契女Tessa邊聽新歌邊跳舞。至於演唱會方面，佢話無論係亞洲抑或美國巡演都想開，不過要視乎疫情再作決定。Van Ness一向透過音樂嚟表達情緒、感覺，而新歌《It’s on》係首情歌，問到感情生活如何？佢直言：「感情很好，我跟我家人感情非常好！」最後佢再以廣東話完結訪問：「多謝大家支持！」大晒親和力！
