【Viu】噚日3月30號係MC張天賦出道一周年嘅大日子！所以佢拍完嘢，捱眼瞓都要堅持開Live，同賦二代玩遊戲抽獎慶祝，佢仲劇透已經錄好新歌，4月就有得聽添喇！唔知係咪因為要出新歌關係，又要應付好多宣傳活動同訪問，MC呢排都積極做運動，希望操fit啲，連賦二代都讚佢好似瘦咗喎！其實一班賦二代等咗成晚，除咗想同MC傾偈之外，都想贏到偶像加持嘅簽名獎品，入面仲有超激罕嘅《造星2》閃咭添啊！不過想贏獎品梗係要考吓大家有幾了解MC先啦！其中有一個問題就問，MC最鍾意邊部周星馳電影喇？見佢將《九品芝麻官》背到滾瓜爛熟，以為呢題實走唔甩啦！點知MC竟然揀咗《家有囍事》，其實星爺嘅戲套套都咁好睇，真係好難揀啊！
