【Viu】《Chill Club推介榜年度推介21/22》由噚晚起一連五晚舉行Live記者會，公布多個獎項入圍名單，噚晚公布嘅就係「年度新人」大獎，一共有26個單位入圍，排名不分先後有石山街、MC $oHo & KidNey、肥仔、Gareth.T、張蔓姿、MC張天賦、Edan、曾比特、ANSONBEAN、Lokman、P1X3L、Kerryta、193、區子琳、張進翹、趙浚承、藍杰、戴晉揚、Canband、陳天翱、力臻、李妍、Ah Hei、谷旻、黎啟峰同高暉。
大部分入圍歌手都有參與Live傾偈兼拉票，Edan同MC張天賦再次喺新人獎上碰頭，二人喺拉票嗰陣分別自爆出新歌時間，Edan會喺4月1日愚人節出Solo歌，愚人節唔知有冇整蠱成份呢？而MC就3月尾至4月頭出新歌，真係無論獎內獎外都競爭激烈！
至於最為搶眼嘅就非肥仔莫屬，雖然193真人冇到，但肥仔就用咗兄弟大相做背景，代對方發言嗰陣又不慎露底，Edan見到即刻大笑：「見到你條底褲！」Thor笑肥仔係為藝術而犧牲，肥仔急住澄清：「係短褲嚟嘅！」
