本港疫情嚴峻，市民都小心翼翼做好防疫，喺街上亦不難見到有人戴兩個口罩。藝人謝安琪（Kay）今日上載跑步相，不過網友一睇就即指口罩唔貼面，擔心感染風險大增！
Kay 一向都出名面尖尖（Photo / Instagram@kaytse）
家住大埔比華利山嘅謝安琪，不時都會外出跑步或者帶兩個小朋友散步。今日佢自己出街跑步都顧及形象，著上白色外套襯白色帽，仲少女感十足咁配上一個粉紅色口罩。不過相中見到口罩明顯唔啱Size，口罩兩邊都非常寬鬆，完全唔貼面。隨即有大批網友留言提醒，叫佢換返個貼面啲嘅口罩保護自己。
為咗襯衫特登戴少女粉口罩（Photo / Instagram@kaytse）
Kay 亦立即出面回應，指自己只係貪靚襯衫，所以揀咗個粉紅色口罩，不過唔知係佢面細定口罩太大，搞到網友咁擔心安全問題，並就此道歉。佢又解釋自己戴咗兩個口罩，裡面仲有一個貼面啲嘅口罩，請網友們放心。
Kay 之前仲話新年食肥咗塊面，睇嚟已經極速瘦返（Photo / Instagram@kaytse）
