謝安琪（Kay）相隔兩年再踏舞台，今次將同MOOV合作，12月29日喺灣仔會展Hall 5BC舉行《MOOV Live謝安琪》演唱會。
Kay下晝到尖沙咀出席演唱會記招，吸引大批傳媒到場。由於疫情反覆，呢兩年唔少大型演唱會都舉行唔到，Kay亦因疫情減少出席公開活動，認為安全和健康最要緊，「我個肺唔太好，之前試過爆肺4次，屬於高危人士，所以疫情期間，我都深居簡出。」佢話見最近本地疫情穩定，所以決定落實開騷日子。
今次《MOOV Live謝安琪》宣傳海報，Kay與MOOV邀請了著名插畫師Vivian Ho及著名攝影師Simon C參與製作。
音樂會當晚，Kay將演唱近日好hit嘅《離不開》，呢首歌已奪得兩個電台流行榜冠軍，Kay自爆揸車時獲知喜訊，激動到爆喊，「屋企人問我做乜咁激動，可能佢哋感受唔到，我覺得好難得，做音樂環境跟之前簽公司不同，而家自資開公司，做事一手一腳去做，辛苦付出有成果，好有滿足感」。
Kay而家要打理公司，考慮嘅問題自然比以前多，尤其要學習資金運用，「我經常計數，拍完個MV又計，見到使費貴會肉赤，要想辦法再儲錢。以前食米唔知米貴，而家知道有分別。」
《MOOV Live謝安琪》獲東亞銀行信用卡贊助，所有門票由東亞銀行信用卡客戶獨家專享，門票不設公開發售。
