【Viu】Candy@COLLAR早前推出第二首Solo歌《燈神》，獲填詞人Wyman睇中聲線係「有喜感嘅陰功豬」，適合進軍慘情歌路線，有Feel喎！Candy自覺《燈神》除咗慘豬外，亦係一首「自我對話」嘅歌曲，現實中亦經常同自己傾偈，連煮飯打爛老抽同蠔油都可以「自我對話」一番，果然係心理學系畢業呀！
至於「燈神」呢個稱號，Candy笑認有料到，尤其係貼《全民造星》心水參賽者嗰陣，「燈力」就最勁喇！雖然有少少黑仔，但Candy視參加《造星IV》為人生中最大嘅幸運，擅長打逆境波嘅佢，仲話依家已經對負評「免疫」，最多謝COLLAR一班好姊妹互相陪伴！想深入了解Candy更多，例如有咩「少女情懷總是詩」？最想拍咩偶像劇？大家記得睇專訪喇！
