【Viu】陳慧琳一共10場《陳慧琳Season 2萬人結界演唱會》噚晚嚟到尾2場，驚喜邀請到電影好拍檔鄭伊健任嘉賓。Kelly話原定伊健係7月20號嚟做完嘉賓後離港，但因颱風延期，最終成功改機票留低！二人合唱《甘心替代你》，伊健仲分享一段鮮為人知嘅往事，「拍《東京攻略》ending時，我要喺零度跳海拍爆炸戲，凍到郁唔到等船接，點知突然見到Kelly伸出『神聖之手』！雖然拉唔到我上船，但佢特登走出嚟，呢份心意我一直記得。」Kelly聽完大笑：「真係全靠隻手！」
伊健繼續爆料：「當時拍動作戲搞到肌肉撕裂， Kelly竟然送盒粉紅色平安膏俾我！好感動，但真係唔多襯佢形象。」Kelly即反擊：「以前出埠最鍾意帶嘛！我同你合作多數喺海外，《東京攻略》喺東京、《幻影特工》喺馬來西亞、《盜馬記》喺布拉格，仲有30年前澳洲演唱會，所以今日專登著西芹裙歡迎！」伊健竟然笑佢似「Big Bird」，又爆《甘心替代你》係自己首次同人合唱，嚇到Kelly瞪大眼：「真㗎？！」伊健之後獨唱《發現》，現場反應熱烈！
另外，音樂總監Mark雷頌德特別從英國返港助陣，更台上真情告白，「你成日多謝我，搞到好似冇雷頌德就冇陳慧琳，其實冇陳慧琳就一定冇雷頌德。真係㗎！大家話，唔係陳慧琳邊有人有氣質唱《風花雪》、唔係陳慧琳邊有人夠清純唱《誰願放手》，唔係陳慧琳邊有人咁型唱《花花宇宙》，所以好多謝你請我嚟享受我哋呢30年嘅成果。」最後聯同單立文、Joey Tang送上《一切很美只因有你》，搞到眼淺嘅Kelly再次眼濕濕。完場時，Kelly被觀眾熱情感動encore，「把聲開始沙，聽日仲有尾場，真係得返半條人命！送首少唱嘅《You’re the one》俾大家。」
