【Viu】陳蕾今年開行Turbo創作，喺近3個月內連推兩首曲、詞包辦「巨作」，真係超勤力呀！最新嘅《求救的勇氣》繼續行治癒路線，以歌寄語低潮時期千祈唔好壓抑自己負面情緒，要大膽搵人求救！而原來新歌背後個故事係關於蕾子嘅close friend，同時佢透露私下都經常收到「仙子」嘅「求救信」，令佢最深刻係邊個故事？「樂壇社工」吸得太多負能量會唔會負荷唔到爆煲？
就算內心有幾強大，都會有脆弱嘅moment，蕾子自爆對上一次喊係最近嘅一個大型音樂會後，之後更情緒低落接近一個星期，究竟發生咩事？蕾子指嗰陣係即刻搵老best Kaho哭訴，順帶講到圈中嘅「樹窿」，佢話除咗Kaho之外，仲有點名岑寧兒、小塵埃，唔知如果蕾子有戀愛嘅煩惱，會搵邊個傾訴先？
另外，相信係忠實仙子、院友，實會記得「陳豪」曾經喺《開一日拖》足膝詳談，講話如果到60歲、人老珠黃冇人要，就會喺埋一齊，事隔近一年嘅時間，呢個承諾係咪堅嘅先？好想知呢～ 去片等蕾子親口話畀你哋聽！
