【Viu】限定組合「PKJ」陳蕾x Kaho洪嘉豪x Jeffrey魏浚笙順利完成亞博騷，直落keep住個hyper mode做訪問！先講到佢哋喺encore環節喪爆秘密，就好似係陳蕾喺同Kaho綵排4手聯彈鋼琴嗰陣，貪玩咪stand唔小心撼崩牙，陳蕾憶述當時腦海一片空白，超擔心係成隻牙冇咗！Kaho就爆陳蕾當知道只係崩咗少少就勁樂觀，個反應直頭係嚇窒咗佢！
跟手Jeffrey仲自稱小學嗰陣就睇陳蕾參加《亞洲星光大道》，話一聽到「陳蕾」呢個名，就莫名有種好強烈嘅feel！好彩Jeffrey夠靚仔，所以陳蕾就原諒咗佢講咁多次！
Jeffrey唔止喺encore嗰陣「焚」咗成對麒麟臂出嚟，有套歌衫係後面開咗一個正方形嘅蠱惑窿，點解煨sir想show呢part出嚟呢？事後佢仲有少少懊惱話唔記得遮胎記，咖啡豆不妨放大check check喎！sexy嘅仲有蕾子，一開騷就lace黑bra配西裝褸，真係睇到都㷫烚烚呀！
Kaho呢晚就同Jeffrey首唱合唱新歌《我感覺到》，貌似感覺到BL味濃，遲吓拍MV嗰陣會唔會加入BL元素玩錫錫？而佢哋喺唱《海邊的呀豪》嗰陣，各自揸咗部「私家車」上台，院長笑話佢差啲「炒車」係練出嚟嘅效果！另外，叱咤最新公布「我最喜愛的男/女歌手」最後10強，入圍嘅Kaho、陳蕾有咩感受？止步喺15強嘅Jeffrey又會唔會覺得失望？成條差唔多有15分鐘嘅足本訪問片零悶場，睇埋先瞓啦！
