【Viu】《KATCH OUR LIFE 陳蕾x 洪嘉豪x 魏浚笙音樂會》今晚唱爆亞博！去到個唱最後部分，PKJ合體大晒舞技，兩舞王加一舞后chok爆跳唱《我說不可以》，唱到一半仲行出延伸台同fans say hi，而最緊要就係個ending pose，真係各有各特色㗎！
跳完一輪嘅PKJ，終於停低同fans傾吓偈，點知呢個「嬲」字組合一講嘢就鬥嘴！陳豪先夾埋對付Jeffrey，取笑佢唔除衫不得止，仲要着多件褸，真係唔應該啦！而當Kaho話想攞紙巾抹汗嗰陣，陳蕾即刻勁大反應問佢係咪要喊，完全係將平時私下最正嗰面show出嚟，好正！
之後三人變身陳三歲、洪三歲、魏三歲，連續再帶嚟《五瓣玫瑰》、《海邊的呀豪》、《Never Say Never》、《相信一切是最好的安排》，實行玩轉成個舞台！唱《海邊的呀豪》嗰陣，佢哋仲揸住架「私家車」喺台上飛馳，見洪三歲多次差啲「炒車」，相反陳三歲、魏三歲就勁穩陣啦！即刻去片睇PKJ玩得有幾癲啦！
