【Viu】阿Sa蔡卓妍、張繼聰前日率一眾《祥賭必贏》演員包括Stanley@MIRROR、kayan9896、朱栢康、岑珈其、胡楓、阿卵楊偉倫、楊偲泳等，出席感謝宴，更即場向監製伍健雄爭取原班人馬再開新戲，監製有求必應話會考慮。席間眾人開香檳慶祝，兼走勻全場逐枱同一眾工作人員敬酒，阿Sa女中豪傑堅飲，相反阿聰就只隊可樂。
成個農曆新年跑逾50場謝票，阿聰笑指二人冇放過假：「好似喺戲院返工咁！然後上到車即刻冇電瞓着，好似細路仔咁！」阿 Sa更試過單拖謝票：「當日我同經理人一齊拎住《祥賭必贏》嘅巨型紙牌喺中環鬧市行去戲院，十足遊街咁，人生真係第一次。」
而朱康亦希望續集可以繼續演中韓混血兒Ian Suen，講獄中生活。而飾演失明賭徒嘅珈其就話想開眼：「導演都對我好好，叫我扮盲人，但唔需要合埋雙眼，但我希望如果有續集可以開返眼。」延續扮盲坐監同朱康對戲。而kayan就被爆過年時謝票主動向觀眾收咗巧多利是，笑C！想感受吓熱鬧氣氛，入嚟睇現場實況片啦！
