【Viu】「宇宙跳唱天團」ERROR今日喺商場首辦簽唱會以慶祝成軍六周年，呢六年歡樂無限呀！錯粉一早就塞爆成個商場，超級墟冚！簽唱會尾段，由客串其新團歌《野舞士》MV嘅陳慧嫻，代宣布ERROR將喺明年1月尾喺會展開演唱會呢個重磅消息！
193表示其實一早就有構思開騷，所以等呢日都有一年嘅時間！四子又不忘自嘲因為ERROR每日都有新聞，要追新聞再度題材都有啲chur！阿Dee更單刀直入自爆呢次開騷都會keep住有一part講嘢for佢自己嘅傳統，呢排諗素材諗到頭都爆，嗌壓力山大呀！肥仔就必定係主力跳唱，講講吓佢哋唔小心大爆邊位成員成日甩step、跳錯添！咁佢哋又會唔會請嘉賓？
ERROR出道六年，肥仔笑指變化得最大係佢哋個樣，當中以阿Dee最出眾，193、保錡加埋把口笑阿Dee花咗唔少心血喺微微調上面，就連棚牙都有「郁」埋，遲啲仲想鑲金牙變「金牙佬x人造人」，咁true㗎咩？
至於講到噚晚最新一集嘅團綜《ERROR死腳膠千萬巨蛋自作夢》，其中一個紅色行程，係193帶頭做「實驗」，自備排泄物同阿Dee一齊「解剖」取出金箔，到底呢條屎橋係邊個諗？193更還原佢「取證」過程，包括原來條長過蕉嘅「金」係焗咗一日，又話入面除咗金箔仲有其他料，到底大家聽咗啲咩？而自稱坎坷嘅阿Dee若然要執行「罰you」卡嘅話，係有幾大鑊？節目播出後，發現原來阿Dee都有份裸體浸戶外溫泉，開騷會重現喺舞台？阿Dee點立flag？一齊睇呢條爆笑訪問片啦！
