【Viu】經典喜劇《開心鬼》系列第二集《開心鬼放暑假》於1985年上映大受歡迎，不但捧紅開心少女組，更成為當年票房頭十位！電影即將邁向四十周年，電影嘅監製及主演黃百鳴特意喺九展星影匯戲院交還及拆卸前嘅最後一晚（6月29日）舉行咗《開心放暑假》限定一場嘅特別放映，廣邀戲中當年的演員袁潔瑩、傅明憲、李麗珍、黃錦燊、陳曼娜等出席，導演高志森仲特意邀請當年繪畫海報嘅阮大勇老師重新繪畫新一張海報，聚首一堂再次欣賞呢套經典作品！
久未露面嘅袁潔瑩消瘦咗唔少，但好精神，佢透露最近生活好平靜，依家多咗時間見朋友同做運動，做返以前較少做過嘅事。被問到會否有戲癮，想復出拍戲？袁潔瑩笑言好難變返「開心少女組」：「有戲癮都好難拍得返『開心少女組』，等今晚看完電影再算。」另一位「開心少女組」成員傅明憲話之前都有翻睇過呢部作品，其實呢部係佢嘅處女作，每次睇返感覺都唔一樣，佢話：「每次睇嘅滋味都唔同，而且每次同大家見面嘅感覺都好開心，覺得永遠都係識得最耐嘅朋友感覺最真。」而呢一集李麗珍雖然冇份拍，但當時都有去現場探班，大家係咪勾起好多集體回憶呢，想睇更多即刻去片。
