【A&M Diary】要數香港嘅人氣馬拉南洋餐廳，當然唔少得蘇媽.蘇媽啦！一直以為蘇媽係一個人嚟，但原來蘇媽.蘇媽係馬拉文「乜嘢都有」嘅意思。的而且確，蘇媽.蘇媽嘅餐牌非常豐富，好多馬來西亞嘅美食都有，但胃就只得一個，所以嚟到屯門TOSS蘇媽.蘇媽，你需要嘅係一本攻略。
椰香咖央多士
咖央多士啱啱烤好，甜甜哋嘅咖央醬同滑溜嘅牛油完全溶化喺香脆嘅麵包當中，甜而不膩。
斑蘭椰絲卷
斑蘭椰絲卷係傳統嘅南洋小食，以香脆嘅外皮配合埋裏面香軟嘅椰絲，加上清香嘅斑蘭味，極具層次。
檳城福建蝦麵滲滲
如果蝦麵同叻沙要二揀一，唔知你係屬於邊個門派呢？由蝦殼同辣椒熬製而成嘅湯底，蝦味濃郁，辣味唔算強烈，反而有醒胃嘅感覺。配料嘅蝦大隻又彈牙，而豬腩肉肥瘦適中，食落亦唔會太肥膩。但最正一定係索晒湯精華嘅滲滲啦！
招牌肉骨茶
食馬拉菜又點少得肉骨茶！呢個雜錦配料嘅肉骨茶，有齊腩肉、三層肉、排骨、冬菇、豬腳等等，份量十足。拳頭咁大嘅排骨可以話係肉骨茶湯底嘅肉香味來源，但同樣地排骨又索晒肉骨茶嘅藥材味，真係要啜晒啲骨香出嚟呀！食肉骨茶除咗撈飯之外，當然唔少得索湯神器：油炸鬼啦！
