【A&M Diary】數學題：海旁＋夜景＋西餐等於咩？就係浪漫呀！呢條數學題，其實係一條拍拖方程式，而其中一個答案，就係位於觀塘嘅La Serre。不過，唔好以為所有浪漫嘅背後都隱藏住貴價，La Serre嘅價錢相當親民，部分日子仲有live music，氣氛相當不錯呢！
香辣棒棒雞
呢個棒棒雞其實就係雞鎚，拎住個雞鎚骨就可以啖啖肉喇！至於雞皮炸得非常香脆，又唔會過分油膩，雞肉非常多汁，味道帶點川椒嘅味道，喺香辣感外加上點點麻味。
大蝦濃汁虎蝦意大利蝴蝶粉
意大利蝴蝶粉充份掛上濃濃嘅大蝦濃汁，至於呢個大蝦濃汁真係驚喜所在，濃厚嘅醬汁充滿蝦嘅鮮甜味，又夠creamy！至於虎蝦大大隻，新鮮彈牙。
軟殼蟹牛油果墨西哥薄餅
墨西哥薄餅大大份，share食就啱曬！一碟有兩塊薄餅，每塊薄餅問都有一隻炸軟殼蟹，同夾住咗幾片牛油果，一啖咬落去嘅時候仲會有勁多汁爆出嚟，超好味！
