【A&M Diary】記得幾年前，有一位台灣朋友嚟香港，我問佢想食啲乜嘢，佢二話不說：「檀島咖啡餅店！」當時嘅我都係第一次食檀島咖啡餅店，聽朋友講，原來檀島咖啡餅店喺台灣都幾有名氣，佢嘅咖啡同蛋撻都幾出名！幾年之後，我同M佬嚟到灣仔嘅檀島咖啡餅店食早餐，發現除咗貴之外，食物質素只係一般般，同當年嘅感覺已經唔同晒。
蛋撻
檀島咖啡餅店一向以遊客生意為主，所以喺疫情期間，生意唔多，蛋撻去貨慢，所以完全凍冰冰！不過，酥皮真係非常鬆脆，蛋香又滑，可惜凍冰冰嘅蛋撻始終不及新鮮出爐嘅吸引。
沙嗲牛肉麵/雪菜肉絲意粉
檀島咖啡餅店港式早餐價值$42，除咗一碗湯麵，仲有雙蛋同麵包，價錢嚟講，真係貴咗少少，性價比唔高。兩碗湯麵同樣地唔係熱辣辣，而且偏鹹，公仔麵嘅麵底就比較硬，相反意粉嘅麵底就好腍。
熱咖啡
檀島咖啡餅店嘅早餐包一杯熱飲，呢杯熱咖啡係成份早餐最熱嘅一樣嘢，咖啡又真係幾香濃，絕對係呢個早餐唯一嘅驚喜。
