【A&M Diary】無論係頹飯之選嘅餐肉蛋飯定黯然銷魂嘅叉燒蛋飯，相信好多茶餐廳都有得食，所以就要搞搞小意思，咁就成為相機食先嘅餐廳啦！上環孖沙茶餐廳就簡單將餐肉蛋飯同叉燒蛋飯由二眼仔飯變成三眼仔飯，咁就輕易成為佢嘅代表作喇！不過，餐廳嘅位置唔大，坐得好密，喺疫情期間嘅風險就比較高喇。
叉燒蛋飯
真係好叻，只係加多隻蛋就成為代表作喇！首先，煎蛋總共有3隻，所以被大家稱為三眼仔飯。由於有3隻蛋黃，所以輕易就撈勻成個飯，而加上蛋汁同甜豉油嘅飯，真係無得輸！不過，叉燒就非常普通，燶邊同半肥瘦都唔會喺呢啲舊式茶餐廳搵到喇！
干炒豬扒意
即叫即炒，夠晒鑊氣！豬扒同意粉份量超多，性價比超班，夠晒抵食！
