【A&M Diary】從前，一個人去食燒肉屬於國際孤獨等級嘅前列位置；但近年興一個人都可以盡興，所以一人燒肉店開到成行成市。不過，一個人食燒肉唔代表款式少、質素差。呢間位於朗屏嘅葫蘆燒肉刺身，就有唔少激安一人前嘅燒肉套餐，CP值超高！
Prime牛肩胛+牛舌芯+特級牛五花套餐
呢個套餐有齊三個唔同部位，而且份量十足。Prime牛肩胛嘅肉質普遍都偏結實，但葫蘆燒肉刺身嘅Prime牛肩胛厚薄適中，非常鮮嫩；牛舌芯絕對係燒肉嘅必點食材，燒香嘅牛舌芯彈牙爽口，牛香撲鼻；牛五花相對肥美，油脂豐厚，雖然有唔少筋膜相連，但正正係呢種筋膜，油脂同肉嘅縱橫交錯，令牛肉嘅肉味更上一層樓。雖然套餐本身已經份量十足，但如果係大胃王仲可以增量，加埋紫菜飯一齊食，飽肚感十足。
吉列炸蝦帶子定食
雖然葫蘆燒肉刺身嘅主打係燒肉，但定食系列都有相當多選擇。吉列炸蝦同吉列帶子嘅表層入口鬆脆，而炸蝦咬落相當彈牙，帶子則肉質緊緻而嫩滑，水準極佳。
