【A&M Diary】Yakiniku Kakura係嚟自日本九州佐賀嘅過江龍燒肉店，喺黃埔開設香港首間海外分店之前，我同M佬都唔太認識呢間餐廳（我哋太孤陋寡聞喇）。但因為餐廳嘅和牛係嚟自評為高等嘅佐賀和牛，口碑同品質非常有保證！Yakiniku Kakura提供九州產極上A5等級嘅黑毛和牛，更供應唔少罕有嘅牛肉部位，今日我同M佬就嚟潮聖，試試傳說中的入口即溶啦！
大判燒黑毛和牛西冷
屬於海外限定嘅大判燒黑毛和牛西冷，係必食同抵食推介！Yakiniku Kakura為咗讓大家體驗最佳時間嘅味覺享受，所以餐廳嘅店員都會幫我哋燒呢塊西冷！西冷大大塊，燒嘅時間啱啱好，店員大概燒到7成熟，將油份迫出，帶有少少焦香，食嘅時候加上蛋汁同燒牛汁一齊食，雖然未至於入口即溶，但就充滿濃郁嘅牛肉同油脂香味，非常豐盈。
A5黑毛和牛三角短骨柳
呢款A5黑毛和牛三角短骨柳就真係入口即溶喇！三角短骨柳係和牛其中一個最嫩嘅部位，油脂比例分佈平均，燒到大概五成熟，而黑毛和牛三角短骨柳上面已有少少調味料，所以我哋都無特別加上其他醬汁。肉汁嫩滑，油香十足，入口即熔！
黑毛和牛腹柳小排
牛肉薄切，輕輕一燒就食得！牛肉嘅脂肪分佈均勻，但就略嫌醬汁太多，食嘅時候會覺得有少少鹹。
