【A&M Diary】其實除咗歌手用作品說話之外，廚師何嘗唔係用作品說話呢？每次入到去餐廳，接待、落單、上菜都一定係待應，你同廚師嘅接觸，只有從食物去感受。嚟到新蒲崗嘅海膽仔，碟碟嘅海膽份量都咁多，我知道廚師一定係想同我講：「見你咁靚，俾多啲你啦！」
倍化帶子呑海膽
勁大粒又厚嘅帶子完美咁解釋咩叫「倍化」！紫菜包住帶子，帶子入邊又夾住海膽，而啲海膽真係多到瀉，絕對無辦法一啖擺晒落口，帶子同海膽都非常鮮甜，係一試愛上嘅餐前小食。
海膽凍豆腐
海膽凍豆腐係一個驚喜嘅菜式，而兩款食物嘅質感相似，充滿大豆味嘅豆腐更突顯海膽嘅鮮甜味，清淡嘅豆腐亦中和海膽嘅濃郁味，兩者非常夾！
熔岩海膽魚餅
即叫即煎嘅魚餅，入面大有乾坤。一啖咬開之後，流心海膽蓉隨即流出。魚餅屬於重口味，所以海膽味唔算太濃，但勝在夠香口，非常惹味！
刺身定食配壽司飯
剌身有厚切三文魚、吞拿魚、北寄貝、赤蝦等，所有刺身都非常新鮮，其中三文魚肥美度十足，大蝦非常彈牙！定食配有沙律、麵豉湯同壽司飯，非常豐富！
海膽三色丼
所謂三色即係海膽、呑拿魚蓉同三文魚籽。其中海膽用木板形式上碟，令成碗飯望落增加唔少儀式感；綿綿嘅呑拿魚蓉再加上脆口嘅三文魚籽，每啖有齊三種層次嘅鮮味，真係好好味呀！至於丼飯同樣配有沙律同麵豉湯，絕對夠飽肚！
