【Now新聞台】截至早上11點，1小時內《彭博》用戶關注度上升最多嘅港股，依次為海底撈、雅居樂集團、龍湖集團、快手、九毛九。
內地疫情升溫，加上市監局指，將進一步加強連鎖食品經營企業食品安全監管，令成個板塊都受壓，海底撈跌逾7%，九毛九跌約10%，跌穿20元，兩隻股份期內跌幅分別約10%同8%，內地餐飲股前景如何？兩隻股份又係唔係時候撈底？
圓通環球金融集團行政總裁曾永堅指，內地餐飲股未來仲有得跌，海底撈、九毛九呢類內地快速餐飲股，無論係內地飲食熱潮，定係資本市場嘅炒作熱潮，高峰期都已經過咗，呢類公司嘅經營模式都係靠喺各地快速插旗去快速增長，從而攞高估值，但上半年嘅業績反映，市場之前對呢類股份睇法太樂觀，加上內地疫情、市監局因素，內地餐飲股都面對拋售壓力，估計海底撈、九毛九短期內好大機會再創新低。
