【Now新聞台】截至早上11點，1小時內《彭博》用戶關注度上升最多嘅港股，依次為中國海外發展、紫金礦業、中煤能源、吉利汽車、思摩爾國際。
即將派季度成績表嘅中海外，股價今朝一度跌5%，成交仲明顯增加。不過，最近唔少內地券商認為，內房最壞時間已過，可以吸納財政健康嘅內房股。中海外一向負債唔高，加上外電最新報道，內地監管部門要求銀行今季加快樓按審批，依家係咪吸納中海外嘅好時機？
大華繼顯執行董事梁偉源指，因為中國恒大事件，銀行審批按揭都保守咗，令內房銷售變差，其中，中海外9月銷售按年大跌42%，情況好罕見。不過，隨著近期焦點去返財政較健康嘅內房，例如中海外冇觸及過3條紅線，長線投資者開始吸納返呢啲股份，若銀行又加快返樓按審批，今季銷售亦會大大改善。
