【Now新聞台】截至早上11點，1小時內《彭博》用戶關注度上升最多嘅港股，依次為銀河娛樂、眾安在綫、旭輝控股集團、波司登、康希諾生物。
今日賭股普遍都可逆市向上，銀娛都唔例外，中午收市報41.1元，升逾3%，澳門上周因颱風圓規，第三次取消就修改博彩業規則進行公眾諮詢嘅會議，但市場預期，修訂初稿會喺11或12月完成，賭股今日逆市齊升，係受修改博彩業條例進展消息利好，定係通關方面有新進展？
圓通環球金融集團行政總裁曾永堅指，其實今次兩者都兼有，睇返銀娛股價，由今年嘅高位大幅回落至依家約40元嘅水平，技術上亦企得穩10天線，修改博彩業條例方面，條例都無市場最初擔心咁收得太緊，即使政策收緊，銀娛受到嘅影響都係較少，所以整體嚟講對銀娛嘅影響係正面大過負面，通關方面，聽日開始就可以澳門入境珠海毋須隔離14日，呢啲消息都利好賭股。
